Mkude hawezi kukwepa lawama

Kiungo Jonas Mkude hakuwemo kwenye kikosi cha Simba kilicholazimishwa sare ya mabao 2-2 dhidi ya Mwadui FC juzi.

Inaelezwa kuwa Mkude alichelewa uwanja wa ndege hivyo kuachwa jijini Dar es salaam wakati Simba ilipoondoka kuelekea Shinyanga.

Baadae alisafiri kuungana na wenzake mkoani humo.

Tukio hilo linadaiwa kumkera kocha Mkuu wa Simba Pierre Lechantre pamoja na benchi lote la ufundi hivyo kuamua kumuweka nje kwenye mchezo huo.

Pengo la Mkude aliye katika kiwango bora sana lilikuwa dhahiri na ndio sababu mashabiki wengi wa Simba wamemshushia lawama.

Japo sababu ya kuchelewa kwake ndege haijawekwa wazi, lakini ni dhahiri sababu hiyo haikulishawishi benchi la ufundi na ndio maana 'aliadhibiwa' kwa kuachwa nje ya kikosi.

Kocha Lechantre amekuwa akisisitiza nidhamu kwa wachezaji wake huku akiwataka waweke mbele maslahi ya timu.

Mkude ni mchezaji kipenzi cha mashabiki wa Simba, uwezo wake dimbani sio wa kutiliwa shaka.

Lakini ni muhimu sana ahakikishe mafanikio yake kama mchezaji hayaathiriwa na masuala ya nutovu wa nidhamu.

Kwani mwisho wa siku hakuna mchezaji mkubwa kuliko klabu ya Simba.