Wakati mwingine ni vyema kuwaamini makocha kwani wanafahamu maamuzi wanayoyachukua ili kuhakikisha timu inapata mafanikio
Mashabiki huwa tunakuwa na wachezaji wetu tunaowapenda na tunapendelea kuwaona uwanjani kila wakati timu inapocheza
Lakini Kocha Sven Vandenbroeck amekuwa tofauti na msimamo wa wengi wetu
Sven amesimamia katika kile anachokiamini na kamwe hakubadili chochote sababu ya kelele zetu mashabiki
Jana amepata alama nyingi sana baada ya kuiwezesha Simba kutinga hatua ya makundi kibabe michuano ya ligi ya mabingwa barani Afrika
Ushindi wa mabao 4-0 umepatikana uwanja wa Benjamin Mkapa huku Sven akitumia timu yake anayoiamini yeye ambayo kwa kiasi kikubwa siyo waliyokuwa wakiitarajia mashabiki
Wakati akimkosa Jonas Mkude, Mbelgiji huyo akafanya mabadiliko mengine kwa kuwaanzisha Larry Bwalya na Said Ndemla eneo la kiungo huku akiwaacha nje nahodha John Bocco na Meddie Kagere
Kuanza na walinzi watatu nyuma kuliwezesha Simba kuwa bora sana katika kutengeneza mashambulizi kupitia pembeni, Shomari Kapombe na Luis Miquissone wakin'gara zaidi wakitokea pembeni
Kwa hakika leo Sven alikuwa shujaa wa Simba kimbinu, nadhani ifike wakati mashabiki tuache kujivika utaalam tusiokuwa nao
Naamini Sven anakwenda kufanya vizuri zaidi kwenye hatua ya makundi ukilinganisha na mtangulizi wake Patrick Aussems
