Wakati zoezi la kurejesha fomu za kuwania nafasi ya Mwenyekiti wa klabu ya Simba likitarajiwa kufungwa leo majira ya saa 12 jioni, aliyewahi kuwa Mwenyekiti wa klabu hiyo Hassan Dalali ni miongoni mwa Wanachama walijitosa kwenye kinyan'ganyiro cha kuwania nafasi iliyoachwa wazi na Swedi Mkwabi
Dalali amesema baada ya kuombwa na Wanachana wengi wakimtaka ajitose kugombea nafasi hiyo, ameitikia wito huo na alichukua na kurejesha fomu
Dalali amesema Wanachama wengi wa Simba walifika nyumbani kwake wakimtaka agombee na zaidi waliamua hata kumtolea fedha ya fomu Tsh Milioni Moja
"Nimechukua fomu kutokana na wanachama kunifuata nyumbani kwangu kuhitaji nifanye hivyo ambao wamenichangia fedha ya kwenda kuchukulia fomu kiasi cha shilingi milioni moja (1,000,000).
"Haina shida iwapo mimi nilikuwa mwenyekiti awali kwa kuwa sikuongoza miaka nane mfululizo, kikanuni inaeleza kuwa iwapo umekuwa mwenyekiti kwa muda wa miaka minne kisha ukaishia hapo na ukakaa pembeni na ukihitaji kugombea tena unaruhusiwa.
"Nisingeweza kuruhusiwa kugombea iwapo ningekuwa nimeongoza kwa miaka nane mfululizo, kipindi kile sikuweza kugombea kutokana na vigezo vilivyowekwa vya elimu ya digrii lakini sasa uchaguzi unakwenda kwa mujibu wa kanuni ya TFF ambayo inaruhusu mtu kugombea akiwa na elimu ya kidato cha nne, "amesema Dalali.
Wanachama wengine wa klabu ya Simba wanaotajwa kujitosa kugombea nafasi hiyo ni Mohamed Soloka na Ayubu Semvua
