Kwa mara ya kwanza kocha mkuu wa Simba Sven Vandenbroeck anatarajiwa kumtumia kiungo mkabaji Thadeo Lwanga kwenye mchezo wa ligi ya mabingwa dhidi ya Platinum Fc ambao utapigwa keshokutwa Jumatano huko Zimbabwe
Mshauri wa Mwenyekiti wa Bodi ya wakurugenzi, Crescentius Magori amethibitisha kuwa Simba imefanikiwa kupata leseni ya mchezaji huyo ambayo itamuwezesha kushiriki mchezo wa Jumatano kama kocha Sven ataamua kumtumia
Lwanga, kiungo wa Kimataifa kutoka Uganda, alisajiliwa na Simba mwanzoni mwa mwezi huu akiwa mchezaji huru baada ya kumaliza mkataba na klabu ya Tanta inayoshiriki ligi kuu ya Misri
Nyota huyo anaweza kuanza sambamba na Jonas Mkude eneo la kiungo
Uwepo wake utampa nafasi Mkude kupanda kuongeza mashambulizi pale Simba inaposhambulia
Lwanga anaonyesha kiwango kizuri katika mazoezi ya Simba wengi wakiwa na matumaini ataitendea haki nafasi aliyopewa
Usajili wake ulikuwa maalum kuchukua nafasi ya Gerson Fraga aliyerejea kwao Brazil kutibiwa jeraha la goti alilopata mwanzoni mwa msimu
