Mlinda lango namba moja wa Taifa hili pamoja na klabu ya Simba Aishi Manula amewaalika mashabiki uwanja wa Benjamin Mkapa kesho Jumatano kushuhudia buradani ya kibingwa kutoka kwa timu yao katika mchezo wa ligi kuu dhidi ya KMC
Manula amesema wakiwa na malengo ya kutetea ubingwa kwa msimu wa nne mfululizo, matokeo ya ushindi ndio ahadi wanayoitoa kwa mashabiki ili kuhakikisha wanapunguza tofauti ya pointi dhidi ya watani zao Yanga
Aidha Manula amesema mchezo huo ni sehemu ya maandalizi ya kikosi kuelekea mchezo wa ligi ya mabingwa dhidi ya Platinum Fc ambao utapigwa wiki ijayo kule nchini Zimbabwe
"Tunajua utakuwa mchezo mgumu na wenye ushindani kwa sababu tunaamini KMC ni timu nzuri. Lakini kulingana na malengo yetu ni kutetea ubingwa kwa msimu wa nne mfululizo hivyo tunachohitaji siku ya kesho ni matokeo ya ushindi tu," alisema Manula
"Mashabiki waje kwa wingi washuhudie burudani, huu ni mchezo ambao sisi tuko nyumbani, tunacheza katika uwanja wa Mkapa sehemu ambayo tumeizoea hivyo tumewaandalia mashabiki wetu burudani nzuri"
"Pia ni mchezo ambao utatupa taswira kuelekea mchezo wetu wa ligi ya mabingwa, hivyo tutacheza katika ubora ambao mashabiki wetu wamezoea kutuona"
Simba iko kwenye nafasi ya pili katika msimamo wa ligi ikiwa imejikusanyia alama 29, alama nane nyuma ya Yanga inayoongoza ligi
Hata hivyo Simba ina mechi mbili za viporo, mchezo dhidi ya KMC ukiwa moja ya mechi hizo
