Kocha Mkuu wa Simba Sven Vandenbroeck amesema suala la mabadiliko ya kikosi kutoka mechi moja na nyingine haliepukiki kutokana na changamoto ya ratiba
Juzi Mbelgiji huyo alitupiwa lawama kufuatia uamuzi wake wa kuwaacha nje baadhi ya wachezaji kwenye mchezo dhidi ya Polisi Tanzania ambapo mabadiliko aliyofanya kwenye kipindi cha pili ndiyo yaliyoihakikishia Simba ushindi kupitia kwa Clatous Chama
Hata Sven amesema ratiba inawalazimu kufanya 'rotation' ya wachezaji kwani kuna wakati wanacheza kila baada ya siku tatu
"Kikosi changu ni kipana, nina uwezo wa kuwapanga wachezaji 11 watakaoanza lakini kwenye benchi nitakuwa na wengine saba ambao wana uwezo kama waliokuwa ndani na wakanipa machaguo mengine tofauti ya kucheza"
"Kwa mechi ya juzi sitaacha kumpongeza Clatous Chama. Ukiachana na upana wa kikosi, mabadiliko mengine yanatokeaa kwa sababu ndani ya mwezi huu kila baada ya siku tatu tutakuwa tunacheza mechi kwa maana ilikuwa lazima wengine wapumzike na kutumia wengine," alisema
Baada ya mchezo wa Jumatano, Simba itashuka tena uwanjani Jumapili, kuikabili Mbeya City kule mkoani Mbeya kisha watarejea jijini Dar es salaam tayari kwa safari ya Zimbabwe kwenye mchezo wa ligi ya mabingwa raundi ya kwanza dhidi ya Platinum Fc
Mchezo huo utapigwa Disemba 22-23 na marudiano kupigwa wiki mbili baadae jijini Dar es salaam
