Mabingwa wa nchi Simba leo wanarejea kwenye mikiki mikiki ya ligi wakiwakaribisha Polisi Tanzania katika mchezo wa ligi kuu utakaopigwa uwanja wa Benjamin Mkapa kuanzia saa moja usiku
Simba inarejea kwenye msako wa taji la nne mfululizo ligi kuu ya Vodacom wakitoka kufuzu raundi ya kwanza ya michuano ya ligi ya mabingwa kwa ushindi wa jumla dhidi ya Plateau United
Mabingwa hao watetezi leo wataingia dimbani bila ya kiungo fundi Larry Bwalya ambaye kocha Sven Vandenbroeck amesema ana matatizo ya kifamilia
Aidha, pamoja na mshambuliaji Chris Mugalu na beki Joash Onyango kupona majeraha yaliyokuwa yanawasumbua, Sven amesema wachezaji hao anaweza akaanza kuwatumia katika mchezo wa Jumapili
Lakini pengine leo Wanamsimbazi watamshuhudia Meddie Kager 'Bull Striker' akianza sambamba na nahodha John Bocco baada ya Wanamsimbazi kumuweka katika presha Sven amtumie Kagere
Tangu kuwasili kwa Kocha Sven, Kagere amekosa mwenendo mzuri wa kuanza kwenye kikosi cha kwanza kukiwa na tetesi kuwa ipo sintofahamu kati yake na kocha Sven
Pamoja na kutumika katika mechi chache, Kagere ameweka kambani mabao manne msimu huu
