Mabingwa wa soka Tanzania Bara Simba leo wana jukumu la Kitaifa pale uwanja wa Benjamin Mkapa watakapoikabili Plateau United kutoka nchini Nigeria katika mchezo wa ligi ya mabingwa
Mchezo huo ni wa marudiano Simba ikishinda bao 1-0 katika mchezo wa kwanza uliopigwa wiki iliyopita kule Nigeria
Kocha Mkuu wa Simba Sven Vandenbroeck amewataka mashabiki wajitokeze kwa wingi kuiunga mkono timu yao
Amesema mchezo hautakuwa mwepesi kwa kuwa timu hizo zinatofautiana kwa bao moja tu, Simba ikiwa na faida ya kufunga bao hilo lililowapa ushindi ugenini
"Utakuwa mchezo mgumu, ni mchezo ambao tumepishana kwa goli moja hivyo lazima tuwe makini na natarajia mashabiki watajitokeza kwa wingi kutushangilia. Timu yao ni nzuri hivyo tunahitaji kila aina ya nguvu ambayo tunayo ili tupate matokeo mazuri," alisema Sven katika maandalizi ya mwisho jana
Kimahesabu, Simba inahitaji ushindi au sare ya aina yoyote ili iweze kutinga raundi ya kwanza. Kucheza katika uwanja wa nyumbani mbele ya mashabiki wao 30,000 kutawaongezea wachezaji ari ya kupambana kuhakikisha wanapata matokeo
Ni utamaduni kwa Simba kuwa ni mwiko kufungwa wanapocheza uwanja wa Benjamin Mkapa, dua za kila Mwanasimba na Watanzania weledi wanaofahamu umuhimu wa Simba kufanya vizuri, wote wanaomba Simba ipate ushindi leo
Kikosi cha kocha Sven kiko kamili, hakuna wachezaji majeruhi hivyo matarajio ni makubwa kuwa mchezo huo utakaopigwa kuanzia saa 11 jioni, utawaacha Wanamsimbazi na furaha baada ya dakika 90
Nusu ya vita ilipiganwa kule Nigeria na Simba kushinda, leo Mnyama anakamilisha nusu nyingine iliyobaki, hakuna shaka hii pia atashinda
