Wakati kesho Jumamosi Simba ikitarajiwa kushuka uwanja wa Benjamin Mkapa kuikabili Plateau United katika mchezo wa marudiano michuano ya ligi ya mabingwa barani Afrika, Kaimu Mwenyekiti wa Simba Mwina Kaduguda, amefunguka mikakati ya usajili kwa ajili ya michuano hiyo
Kaduguda amesema lengo la Simba msimu huu ni kufika nusu fainali ya michuano hiyo mikubwa zaidi barani Afrika katika ngazi ya vilabu
Amesema wanahitaji kuwa na kikosi kilichokamilika kila idara kuweza kutimiza malengo hayo
"Tumejipanga kuimarisha maeneo ambayo kocha amependekeza yaimarishwe. Umeona tumesajili kiungo mkabaji (Taddeo Lwanga) ambaye amechukua nafasi ya Fraga tuliyemsafirisha kwao Brazil ili akapate matibabu ya uhakika zaidi," alisema
"Lakini nafikiri yapo maeneo mengine ambayo tutaboresha hasa nafasi ya ulinzi na ushambuliaji. Unajua Mugalu (Chris) amekuwa akisumbuliwa na majeraha ya mara kwa mara, hivyo tunadhani huko mbeleni jambo hilo linaweza kutusumbua tukiwategemea washambuliaji hawa waliopo pekee"
"Kama malengo yetu yatafanikiwa, tutacheza zaidi ya mechi kumi mpaka kufikia hatua ya nusu fainali, ni lazima tuwe na kikosi imara ambacho kina wachezaji zaidi ya mmoja katika kila nafasi," aliongeza Kaduguda
Miongoni mwa wachezaji ambao wanatajwa huenda akarejea ni Mganda Emmanuel Okwi aliyeondoka msimu uliopita akijiunga na Al Ittihad ya nchini Misri
Shirikisho la Mpira wa Miguu Barani Afrika (CAF) limeziruhusu timu zinazoshiriki michunao ya ligi ya mabingwa na kombe la Shirikisho kusajili wachezaji 40
Aidha TFF imeruhusu Simba kusajili wachezaji watano zaidi wa kigeni ambao hata hivyo hawatashiriki mechi za ligi kuu kama watakuwa nje ya idadi ya nyota 10 wanaoruhusiwa
