Huku ikimtambulisha kiungo mpya Taddeo Lwanga kutoka Klabu ya Tanta ya Ligi Kuu Misri na timu ya Taifa ya Uganda, uongozi wa Klabu ya Simba umesema kamwe hautawadharau wapinzani wao kwenye mechi ya marudiano ya Ligi ya Mabingwa Afrika, Plateau United kutoka Nigeria
Aidha, Simba ambayo itarudiana na Wanigeria hao Jumamosi katika Uwanja wa Benjamin Mkapa jijini Dar es Salaam, imesema lengo lao ni kuingia uwanjani kupambana mwanzo mwisho ikisaka ushindi wa kishindo sambamba na kuonyesha 'Tiki-taka' kwa mashabiki wao na wapenzi wa soka nchini kwa ujumla.
Tiki-Taka ni staili ya Kihispania ya uchezaji soka la pasi fupi na kupenyeza mpira katika nafasi mbalimbali likienda sambamba na kumiliki zaidi mpira.
Akizungumza na waandishi wa habari jijini jana, Mwenyekiti wa Klabu ya Simba, Mwina Kaduguda, alisema wanajipanga kuhakikisha wanafanya vizuri katika mchezo huo wa maruadiano ili kuvuka hatua hiyo ya awali na endapo wataibuka na ushindi, Simba watacheza na mshindi wa jumla kati Costa do Sol ya Msumbiji ama FC Platinum ya Zimbabwe ambayo nayo ilipata ushindi wa mabao 2-1 katika mechi ya awali ugenini.
Alisema hii ni mara ya kwanza kwa timu kutoka Tanzania kushinda ugenini katika ardhi ya Nigeria, hivyo wanahitaji kupambana dakika 90 zingine kutafuta ushindi, ili kufikia malengo yao ya kusonga mbele ya michuano hiyo na kufika nusu fainali.
"Hatutabweteka, mimi najua mpira wale jamaa ni wazuri, tunatakiwa kupambana dakika 90, tunafanya jitihada za kuhakikisha hawatoki katika uwanjani wetu wa nyumbani.
"Hatusikilizi propaganda kwamba wapinzani wetu ni wa kawaida maana ni mabingwa wa Nigeria tukumbuke amemfunga Enyimba ambaye ni mabingwa mara tatu, kila mmoja anajua ubora wa Enyimba," alisema Kaduguda.
Kaduguda pia hakusita kuipongeza Bodi ya Wakurugenzi wa Simba chini ya Mwenyekiti wao, Mohamed 'Mo' Dewji, kwa kujitolea kusaidia klabu hiyo hasa katika kipindi hiki cha mchakato wa mabadiliko.
Alisema Mo Dewji amefanikiwa kutoa Sh. milioni 700 kuhakikisha anamwongeza mkataba Clatous Chama kuendelea ili kubaki ndani ya klabu hiyo.
"Ukimtoa Chama, hivi leo (jana) tumetambulisha nyota mpya Mganda Taddeo Lwanga ambaye anakuja kuchukuwa nafasi ya Gerson Fraga," alisema Kaduguda.
