Kocha Mkuu wa Simba Sven Vandenbroeck amesema amekamilisha maandalizi ya kikosi chake kuelekea mchezo wa kwanza wa ligi ya mabingwa hatua ya awali dhidi ya Plateau United ambao utapigwa kesho Jumapili uwanja wa New Jos, Nigeria
Sven amesema vijana wake wako timamu kimwili na kiakil, kila mmoja akiwa tayari kuelekea mchezo huo
Amesema kama timu wameweka malengo ya kupata matokeo mazuri ambayo yatawaweka katika nafasi nzuri ya kusonga mbele hatua inayofuata
"Kila kitu kipo sawa, kila mmoja yupo tayari kwa mchezo na wana furaha na hilo. Tulichofanyia kazi wiki kadhaa zilizopita inabidi tukitumie kesho. Mipango yetu imejikita zaidi upande wetu ili kuhakikisha tunapata ushindi"
"Hatuna taarifa kuhusu Plateau United lakini mwanzoni tutaanza kwa kuimarisha eneo la ulinzi na kuangalia uimara na udhaifu wao upo eneo gani na baada ya hapo tutaangalia cha kufanya," alisema Sven
Nao wachezaji nahodha John Bocco na Clatous Chama wamewaahidi Wanamsimbazi kuwa kesho watakuwa na kazi moja tu, kuipigania timu kuhakikisha wanapata matokeo mazuri
"Tunajua wamejiandaa lakini sisi tunaenda kupambana kwa ajili ya timu yetu ili tushinde na kupata matokeo mazuri," alisema Bocco
"Tunatakiwa kuwa makini na tufanye kazi kwa pamoja. Tunaamini tunauwezo wa kufika mbali zaidi huu msimu. Hii mechi tunategemea matokeo mazuri kuanzia hapa Nigeria na tukipata matokeo hapa itakuwa rahisi kumalizia kule Tanzania," maneno ya Clatous Chama
