Mratibu wa Simba Abbas Gaza amesema kikosi kiliwasili salama Mjini Jos wakiendelea na maandalizi yao kuelekea mchezo wa kwanza wa ligi ya mabingwa hatua ya awali dhidi ya Plateau United
Mchezo utapigwa kesho Jumapili saa kumi Alasiri kwa saa za Nigeria ambapo kwetu Tanzania itakuwa saa 12 jioni
Kumekuwa na matukio ya hapa na pale ambayo Simba imekutana nayo, hata hivyo mabingwa hao wa nchi walijipanga kukabiliana na mazingira yoyote ugenini kwani kwa soka la Afrika mambo hayo ni jambo la kawaida
Katika moja ya changamoto ambazo Simba walikumbana nayo jana baada ya kuwasili mji wa Jos ni pale wapishi wa Simba walipokataliwa kupika chakula katika Hoteli waliyofikia, wenye hotel wakigoma na kusisitiza chakula lazima kipikwe na wapishi wao
Lakini pia kumekuwa na taarifa ya uwepo wa mpango wa kuwakwamisha baadhi ya wachezaji wa Simba wasishiriki mchezo huo kwa kisingizio cha vipimo vya COVID-19
Juzi walizusha taarifa za kudai kunasa mpango wa baadhi ya wachezaji wa Plateau United kuhongwa na maafisa wa Simba, jambo ambalo halikuwana ukweli wowote
Plateau United ni kama wameingia hofu baada ya kubaini Simba iko imara na zaidi mafanikio iliyopata Simba katika michuano hiyo misimu miwili iliyopita
Gaza amesema hawatishwi na changamoto wanazokutana nazo kwani walizitarajia lakini muhimu kwao ni kuhakikisha wanapambana ili kupata matokeo
"Kila kitu kinakwenda kwa namna ambavyo kimepangwa, hatuna mashaka tunaamini kwamba yote ambayo yanatokeo huku tutapambana kupata matokeo," alisema
