Kipigo kingine cha mbwa koko kimeiangukia Coastal Union leo baada ya kukubali kichapo cha mabao 7-0 kutoka kwa mabingwa wa nchi, Simba
Ulikuwa mchezo wa ligi kuu ambao ulipigwa uwanja wa Sheikh Amri Abeid mkoani Arusha ukishuhudiwa na Mtendaji Mkuu wa Simba Barbara Gonzalez akiwa sambamba na baadhi ya wajumbe wa Bodi ya Wakurugenzi
Ubora wa Simba ulidhihiri mapema tu kwani walihitaji dakika tatu kuandika bao la kuongoza kupitia kwa Hassan Dilunga
Mvua ya mabao ikafuatia, nahodha John Bocco akiwa mchezaji wa pili kufunga hat-trik msimu huu
Winga Bernard Morrison naye akafungua akaunti yake ya mabao, akiweka kambani bao kwa ustadi kabisa dakika za lala salama kipindi cha kwanza
Kipindi cha pili Simba iliendelea kutawala mchezo, kilichokuwa kikisubiriwa ni idadi ya mabao yatakayopatikana kwenye kipindi hicho
Mwamba wa Lusaka Clatous Chama akaongeza mawili na hivyo kuihakikishia Simba ushindi huo mnono
Simba hii, sio ya kuisogelea hasa inapokuwa kwenye ubora wake, Coastal Union walijaribu kupimana ubavu na maji yenye kina kirefu, wakazama!
Hiki ni kipigo cha pili kikubwa Simba inaishushia Coastal Union, msimu mmoja nyuma, wagosi wa kaya walivurumishwa mabao 8-0 pale uwanja wa Uhuru
Ushindi huu ni salamu kwa Plateau United ambao ndio wanaofuata kuonja machngu ya Mnyama kwenye mchezo wa hatua ya awali ligi ya mabingwa ambao utapigwa wiki ijayo nchini Nigeria
Mchezo wa marudiano utapigwa nchini mwanzoni mwa mwezi Disemba
