Mlinda lango namba moja wa timu ya Taifa Aishi Manula amesema anaamini bado wana nafasi ya kufuzu fainali za michuano ya Afcon 2021 itakayofanyika mwakani nchini Cameroon
Manula alikuwa sehemu ya kikosi cha Stars ambacho jana kililazimishwa matokeo ya sare ya bao 1-1 dhidi ya Tunisia
Mlinda lango huyo bora Tanzania kwa misimu minne mfululizo, amesema umoja na mshikamano ndio silaha muhimu katika kampeni ya kusaka nafasi hiyo
"Bado kama nchi tuna nafasi ya kufuzu kwenda AFCON, umoja na mshikamano kama nchi ni bora na muhimu zaidi kwa sasa kwenye michezo iliyobaki, tutarejea tukiwa imara na kupata tiketi ya kufuzu inshaallah," aliandika Manula kwenye ukurasa wake wa mtandao wa kijamii
Stars haipaswi kupoteza mchezo katika miwili iliyobaki ili kuwa na nafasi ya kufuzu
Katika msimamo wa kundi J inashika nafasi ya tatu ikiwa imejikusanyia alama nne, Guinea ya Ikweta iko juu yake nafasi ya pili ikiwa na alama sita
Tunisia tayari imefuzu ikiwa vinara wa kundi J na alama zao 10 wakati Libya inashika nafasi ya nne ikiwa na alama tatu
Michezo ya kukamilisha hatua ya makundi itapigwa mwakani ambapo Stars itaanzia ugenini kuikabili Guinea ya Ikweta kisha kurejea nchini kumaliza mchezo wa mwisho dhidi ya Libya
