Mwishoni mwa wiki wakati akizungumza na Wanahabari, Mwenyekiti wa Bodi ya Wakurugenzi klabu ya Simba Bilionea Mohammed Dewji 'Mo' alisema kuanzia wiki hii wataweka hadharani nyota walioongeza mikataba pamoja na wale wapya waliowasajili kwa ajili ya michuano ya ligi ya mabingwa itakayoanza mwishoni mwa mwezi huu
Vilabu vyote vinavyoshiriki michuano ya ligi ya mabingwa na kombe la shirikisho msimu huu, vimeruhusiwa kusajili wachezaji 40 kukabiliana na changamoto zinazosababishwa na corona pale baadhi ya wachezaji wanapokumbwa na virusi vya ugonjwa huo
Mo alithibitisha kuongezwa mkataba wa Clatous Chama huku akibainisha kuwa hatma ya nyota wengine akiwemo mfungaji bora Meddie Kagere itafahamika wiki hii
Inaelezwa Kagere pia ameongeza mkataba wa kuendelea kubaki Msimbazi kwa muda mrefu zaidi
Simba imekusudia kutumia nafasi 10 walizopewa na CAF kusajili nyota 10 wa kigeni ili kuhakikisha wanakuwa na kikosi imara kwenye michuano ya ligi ya mabingwa
Hata hivyo Mo alisema wanasubiri mwongozo wa TFF baada ya kuandika barua rasmi kwa shirikisho hilo wakiomba ruhusa ya kufanya usajili huo
