Timu ya Taifa ya Tanzania 'Taifa Stars' leo wana kazi moja tu, kuhakikisha wanapata alama tatu muhimu dhidi ya Tunisia katika mchezo wa kuwania kufuzu tiketi ya fainali za Afcon 2021
Huu ni mchezo wa kufa au kupona kwa Stars kwani ni alama tatu ndizo zitakazowaweka katika mbio za kuwania kufuzu tiketi ya michuano hiyo kwa mara ya tatu
Ushindani ni mkali kwani ukiiacha Tunisia ambayo iko kwenye nafasi nzuri ya kufuzu kundi J ikiwa na alama tisa, Tanzania, Guinea ya Ikweta na Libya zina alama tatu kila moja
Matokeo tofauti na ushindi yanaweza kukatisha matumaini ya kufuzu kwa michuano hiyo
Kocha Etienne Ndayiragije amesema vijana wake wako tayari kwa mchezo, jana wakikamilisha maandalizi ya mwisho
Ndayiragije amesema ni mchezaji mmoja tu Salum Abubakar ambaye atakosekana kutokana na majeraha aliyopata kwenye mchezo uliopita
Tunisia wao hawatakuwa na presha sana leo kwani kimahesabu, wanahitaji alama moja kutoka mechi tatu zilizobaki waweze kufuzu
Mashabiki wa soka nchini wametakiwa kuwa wamoja kwa kuiunga mkono timu ya taifa ili iweze kuibuka na ushindi
Mechi itapigwa kuanzia saa nne usiku yakiwa ni maelekezo ya Shirikisho la soka barani Afrika (CAF)
