Mabingwa wa nchi Simba hawana presha yoyote kuelekea michuano ya ligi ya mabingwa barani Afrika ambayo hatua ya awali inaanza mwishoni mwa mwezi huu. Bajeti kabambe ya fedha imetengwa kwa ajili ya kuiandaa timu kuelekea michuano hiyo
Akizungumza Dar es Salaam jana, Mwenyekiti wa Bodi ya Wakurugenzi ya Simba, Mohammed Dewji ‘Mo’ bila kuitaja, alisema bajeti hiyo ni kubwa na haihusiani na michezo ya Ligi Kuu Tanzania Bara.
"Shabaha yetu ni kufanya vyema kwenye Ligi ya Mabingwa Afrika safari hii, ili kufika huko tumetenga bajeti inayojitegemea sambamba na motisha watakayopewa wachezaji watakapofanya vizuri katika mechi hizo, " alisema Dewji.
Dewji alisema baada ya kuwajua mpinzani wao, sasa wanajipanga upya wakijua changamoto gani walizopata msimu uliopita na kutolewa katika raundi ya mwanzo kabisa.
"Tumeshamjua mshindani wetu, tunaenda katika mashindano tukiwa na rekodi mbaya ya kutolewa mapema msimu uliopita na UD Songo ya Msumbiji, sasa tunajipanga vizuri kuwakilisha nchi vizuri," alisema Dewji.
Alisema wanaenda kuanzia ugenini wakiwa na faida ya wenyeji kucheza mchezo huo wakiwa bila mashabiki wao kutokana na ugonjwa wa covid-19 hali ambayo itapunguza presha kwa wachezaji wa Simba.
"Na tukaporudi kucheza nyumbani taarifa njema ni kwamba mashabiki wataruhusiwa kuingia nusu ya uwanja, hii itakuwa faida kwetu kwani tutakuwa nyumbani hivyo ni fursa kwetu kupigania ushindi," alisema.
Pia alisema wana mpango wa kuandika barua kwenda Shirikisho la Soka Tanzania (TFF) kuomba waruhusiwe kuongeza idadi ya wachezaji wa kigeni watatu kuwatumia kwenye michuano hiyo.
"Kuelekea kwenye dirisha dogo tutafanya usajili wa wachezaji baada ya Gerson Fraga kuumia na tunataka mchezaji wa kumbadili, lakini pia tutaandika barua kwenda TFF kuomba kuongeza wachezaji zaidi ya 10 ili kuwatumia katika michezo ya kimataifa," alisema.
