Kiungo raia wa Brazil Gerson Fraga atakuwa nje kwa zaidi ya miezi sita baada ya kupata majeraha katika mchezo dhidi ya Biashara United
Fraga aliongeza mkataba wa mwaka mmoja mwanzoni mwa msimu lakini anaweza asipate tena nafasi ya kuichezea Simba baada ya uongozi kufikia nae makubaliano kumruhusu arejee Brazil ili akapate muda wa kutosha kupona majeraha
Simba inatarajiwa kutumia dirisha dogo la usajili kushusha kiungo mwingine mkabaji kuchukua nafasi yake
Kwa mara nyingine, jina la Mghana James Kotei limeibuka katika orodha ya nyota wanaoweza kutua Msimbazi
Kazi aliyofanya Simba imeendelea kubaki mioyoni mwa mashabiki, haishangazi kuona mara kwa mara ametajwa kurejea Msimbazi
Kotei ni mchezaji mwenye mapenzi na Simba, mara kadhaa mwenyewe ameweka wazi hilo
Kuna wakati alihusishwa kuwaniwa na Yanga kupitia kampuni ya GSM, hata hivyo 'alichomoa' akisisitiza kujiunga na Yanga ni sawa na kuwasaliti mashabiki wa Simba anaoheshimiana nao sana
Hata hivyo tangu alipoondoka Simba, Kotei hakuwa na mwendelezo mzuri wa kucheza mpira
Alisajiliwa na Kaizer Chiefs lakini hakuweza kupata nafasi ya kucheza hata mchezo mmoja mpaka pale alipofikia makubaliano ya kuvunja mkataba wake miezi mitano tu tangu walipomsajili
Akaelekea kule nchini Belarus ambako pia hakudumu, alivunja mkataba baada ya miezi minne tu
Pengine Simba inapaswa kujiridhisha na kiwango chake kwanza kabla ya kufikiria kumpa mkataba kwani muda aliokaa nje ni mrefu kuliko muda aliocheza
Lakini kama watajiridhisha kuwa bado anao uwezo, Kotei anaweza kuwa mchezaji sahihi kuchukua nafasi ya Fraga
