Kocha Mkuu wa timu ya Taifa ya Tanzania 'Taifa Stars' Etienne Ndayiragije amesema bado wana nafasi ya kufuzu kwa fainali za Afcon 2021 kama watafanya vizuri katika michezo mitatu iliyobaki
Jana Tanzania ilifungwa bao 1-0 na Tunisia katika mchezo uliopigwa nchini Tunisia, timu hizo zitarudiana jijini Dar es salaam Novemba 17 2020
Matokeo hayo yameifanya Tanzania ishike nafasi ya mwisho kwenye msimamo wa kundi J lakini ikiwa na alama tatu sawa na Equitorial Guinea na Libya
Ndayiragije amesema wanaelekeza nguvu zao kuelekea mchezo wa marudiano dhidi ya Tunisia kuhakikisha wanaibuka na ushindi
Amesema watafanyia kazi mapungufu yaliyojitokeza katika mchezo wa jana ili waweze kufanya vizuri
"Haukuwa mchezo mwepesi, tulikutana na wapinzani ambao wako imara lakini hata sisi tulicheza vizuri. Yapo maeneo ambayo hatukufanya vizuri, tunajipanga kusahihisha makosa ili tufanye vizuri katika mchezo utakaochezwa nyumbani," alisema
"Kucheza nyumbani mbele ya mashabiki wetu nafikiri itakuwa faida kwetu. Tutahakikisha tunapata matokeo mazuri ili tujiweke katika nafasi nzuri ya kufuzu"
Shirikisho la soka barani Afrika (CAF) limeruhusu mashabiki 30,000 kuingia uwanja wa Benjamin Mkapa kushuhudia mchezo huo ambao utaamua mustakabali wa Tanzania kufuzu fainali za Afcon 2021
