Kiungo Mzambia Clatous Chama amethibitisha kuwa amefanya mazungumzo na uongozi wa Simba na kama kila kitu kitaenda sawa, atasaini mkataba mpya
Aidha Mzambia huyo amesema pamoja na kuwa na ofa nyingi mkononi, ameipa Simba kipaumbele
"Nimefanya mazungumzo na viongozi juu ya kuongeza mkataba mpya. Yapo mahitaji nimeyaweka mezani kwa viongozi wangu. Naamini kila kitu kitaenda sawa na karibuni nitaongeza mkataba," alisema Chama ambaye kwa sasa yuko Zambia akiwa na majukumu ya timu ya Taifa
"Kwa Tanzania kipaumbele nimewapa waajiri wangu Simba, sifikirii kujiunga na timu nyingine yoyote na hata ikitokea hatukufikia makubaliano basi nitaangalia ofa nyingine kutoka nje ya nchi. Nina ofa kutoka Afrika Kusini na hata Arabuni"
Nae Mtendaji Mkuu wa Simba Barbara Gonzalez amewatoa hofu mashabiki wa timu hiyo kuwa wasiwe na wasiwasi kwani Chama hataondoka Msimbazi
"Tumezungumza na Chama, tuko katika hatua ya mwisho kabisa kukubaliana asaini mkataba mpya. Nadhani kila kitu kitawekwa hadharani karibuni.
"Simba ndio klabu kubwa nchini, malengo yetu ni makubwa pia, Chama hawezi kuondoka Simba akajiunge na Yanga. Kama mashabiki wa Yanga wanamsubiri Chama kwenye timu yao basi wajiandae kisaikolojia kwani watamshuhudia Msimbazi kwa muda mrefu zaidi," alisema Barbara
