Zacharia Hans Poppe mmoja wa wajumbe wa Kamati ya usajili ya klabu ya Simba ameeleza kutofurahishwa na viwango vilivyoonyeshwa na baadhi ya wachezaji katika mchezo dhidi ya Yanga uliopigwa jana uwanja wa Benjamin Mkapa na kumalizika kwa sare ya bao 1-1
Akizungumza baada ya mchezo huo ambao uliishuhudia Simba ikisawazisha bao dakika za lala salama kupitia kwa beki Joash Onyango, Hans Poppe aliwataja wachezaji Clatous Chama, Luis Miquissone na Larry Bwalya kuwa walicheza chini ya kiwango
"Angalia viwango vya Bwalya na Luis (Miquissone), hivi huwa wanacheza vile kweli?. Hata Chama mliyemuona leo ndiye hucheza vile kweli? Angalia bao alilokosa dakika za mwishoni mpaka sasa hatuelewi ilikuwaje, akakosa. Nafikiri kuna haja ya kuzungumza nao na kufahamu ilikuwaje?," alisema Hans Poppe
Juzi kabla ya mchezo kocha mkuu wa Simba Sven Vandenbroeck alimtaja Chama kuwa mmoja wa wachezaji majeruhi na pengine angekosa mchezo huo dhidi ya Yanga
Jana Chama alipoa sana, ilikuwa dhahiri mwamba huyo wa Lusaka hakuwa katika kiwango chake na pengine ndio sababu Hans Poppe amemtilia mashaka
Ikumbukwe mpaka sasa Chama amegoma kuongeza mkataba mpya licha ya kuwa tayari uongozi umemuwekea ofa nono mezani
Bwalya alitolewa baada ya dakika 45 nafasi yake ikichukuliwa na Hassan Dilunga wakati Miquissone pamoja na kuwa hakuwa na mchezo mzuri sana, juhudi zake zilionekana uwanjani
