Kocha Mkuu wa Simba, Sven Vandebrock amesema ni lazima wahakikishe wanashinda michezo dhidi ya Yanga na Azam FC ili kuwa juu yao katika mbio za kuwania ubingwa msimu huu
Simba baada ya kuibuka na ushindi wa mabao 2-0 dhidi ya Kagera Sugar juzi kwenye Uwanja wa Uhuru, imewasogelea wapinzani wake Azam na Yanga kwa tofauti ndogo ya pointi.
Sven amesema ili kutetea ubingwa wao kwa msimu wa nne mfululizo, ushindi wa mechi dhidi ya Yanga hapo kesho na baadae Azam Fc ni matokeo muhimu
"Kushinda kila kitu ni ngumu lakini tumebakiza pointi chache kulingana nao, tuna kila kitu mikononi mwetu muhimu ni kushinda mechi mbili za Yanga na Azam hapo sasa tunaweza kuanza kufikiria ubingwa" alisema Sven baada ya mchezo dhidi ya Kagera Sugar juzi
Kesho Jumamosi, Wekundu hao wa Msimbazi wanatarajiwa kukutana na watani wao wa jadi Yanga katika mchezo unaosubiriwa kwa hamu na mashabiki wa soka nchini
Kuelekea mchezo huo, Sven amesema vijana wake wako sawa japo wapo baadhi ya wachezaji anahitaji kuwaangalia hali zao baada ya kupata majeraha kwenye mchezo dhidi ya Kagera Sugar
Shomari Kapombe na Clatous Chama ndio wachezaji ambao walipata changamoto ndogo ndogo katika mchezo uliopita
Hata hivyo Sven amesema nyota hao watakuwepo uwanja wa Benjamin Mkapa kuikabili Yanga Jumamosi
