Kocha Mkuu wa Simba Sven Vandenbroeck ametolea ufafanuzi wa uamuzi wake wa kubadili nahodha wa kikosi chake kwenye baadhi ya mechi
Katika mchezo dhidi ya Ruvu Shooting, Jonas Mkude ndiye aliyakabidhiwa kitambaa cha unahodha
Wapo walioona mabadiliko hayo kama jambo linaloashiria sintofahamu kwani katika mchezo huo, nahodha msaidizi Mohammed Hussein alikuwepo dimbani
Hata hivyo Sven amesema anao wachezaji saba kwenye kikosi chake ambao anaweza kuwatumia kama manahodha na hivyo sio ajabu kumkabidhi kitambaa mchezaji mwingine nje ya wale wanaofahamika
"Tuna wachezaji zaidi ya saba ambao wanaweza kuvaa kitambaa cha unahodha. Ni suala la kawaida kubadilisha manahodha kulingana na mechi," amesema Sven
Ufafanuzi kama huo ulitolewa hivi karibuni na Msemaji wa Simba Haji Manara ambaye alisisitiza kuwa ni uamuzi wa kocha kumkabidhi kitambaa cha unahodha mchezaji yeyote katika kikosi cha Simba lakini inafahamika nahodha ni John Bocco na Msaidizi ni Zimbwe Jr
