Kocha wa Simba, Sven Vandenbroeck, amesema anaamini kikosi chake kitaendelea kufanya vyema Ligi Kuu Tanzania Bara (VPL) na kukaa kileleni
Simba ilifanikiwa kupata ushindi wa tano, baada ya kuifunga mabao 5-0 Mwadui katika mchezo wa ligi hiyo uliochezwa juzi kwenye Uwanja wa Uhuru, jijini Dar es Salaam
Kabla ya ushindi huo, Simba ilipoteza michezo miwili mfululizo ikifungwa bao 1-0 na Tanzania Prisons kwenye Uwanja wa Nelson Mandela, Sumbawanga, kisha kupata kichapo kama hicho kutoka kwa Ruvu Shooting katika dimba la Uhuru.
Akizungumza baada ya mchezo wa juzi dhidi ya Mwadui, Vandenbroeck alisema amefurahi kupata ushindi huo, baada ya kuwa katika wakati mgumu wa kupoteza pointi sita ugenini na nyumbani.
Sven alisema baada ya ushindi huo, ataendelea kuboresha kikosi chake kutokana na kasoro zilijitokeza ili kuhakikisha wanapata ushindi katika michezo itakayofuata.
Malengo yaliyowekwa ni kuongoza katika msimamo wa ligi hiyo na baadaye waweze kutetea ubingwa wao kwa mara ya nne mfululizo
