Pamoja na kupoteza mechi mbili zilizopita, Mkuu wa Idara ya habari na Mawasiliano klabu ya Simba Haji Manara amesema bado anaamini wana kikosi imara kinachoweza kushinda ubingwa msimu huu
Mhamasishaji huyo namba moja wa Simba amewataka mashabiki kusahau matokeo hayo yaliyopita na kujitokeza kwa wingi kuiunga mkono timu yao katika mchezo dhidi ya Mwadui ambao utapigwa kesho Jumamosi
Manara amesema Simba imejiwekea malengo ya kushinda mataji hivyo ni jukumu lao kuhakikisha wanafanya vizuri katika mechi zote zinazokuja mbele yao
"Sina shaka kuhusu hili, Simba itatatwaa ubingwa kwa msimu wa 2020/21 lakini lazima tupate matokeo mazuri ambayo yatatupa pointi tatu muhimu. Kushindwa kwetu kwenye mechi zilizopita kunaleta maumivu lakini ni muhimu mashabiki wetu wajue kwamba tunahitaji umoja kwani katika umoja wetu Simba hatujawahi kushindwa"
"Tuwaunge mkono wachezaji wetu kwa kujitokeza kwa wingi uwanjani katika mchezo dhidi ya Mwadui Fc. Tuonyeshe kuwa pamoja nao, itawaongezea hamasa na inshallah tutapata matokeo," alisema Manara
Mchezo dhidi ya Mwadui Fc utapigwa Jumamosi, kuanzia saa kumi Alasiri kwenye uwanja wa Uhuru
