Kufungwa mechi mbili mfululizo kwa klabu kubwa kama Simba ni matokeo yasiyokubalika. Kocha Mkuu wa Simba Sven Vandenbroeck ana maswali ya kuwajibu mabosi wake kutokana na matokeo haya
Simba ina wachezaji wengi mahiri, kukosekana kwa Chama, Kagere au Mugalu haiwezi kuwa sababu ya timu kufungwa kizembe
Bado naamini Simba ina kikosi bora sana ukilinganisha na timu nyingine hata inapowakosa wachezaji hao
Simba itashiriki michuano ya ligi ya mabingwa barani Afrika msimu huu, mechi za hatua ya awali zikitarajiwa kupigwa mwezi ujao
Sio kwa Simba hii ya Sven ambayo inapungua makali siku hadi siku. Sven ana kazi ya kufanya kuhakikisha anarejesha makali ya timu kabla ya kuanza kwa michuano hiyo
Suala la upangaji wa kikosi bado linaonekana kuwa changamoto kwake. Wachezaji wengine wametumika sana huku wengine wakiwa na nafasi finyu kikosini, matokeo yake wengi wamepoteza kujiamini na sasa madhara yake yanaonekana
Ni jambo la hatari kama inafikia wakati timu haiwezi kupata matokeo kama mchezaji mmoja au wawili wanakosekana
Pamoja na kuwa na wachezaji mahiri, Sven amepoteza ile dhana ya Simba kuwa na kikosi kipana, kwani jambo hilo halionekani tena
