Mabingwa wa nchi Simba leo wako mkoani Rukwa ambapo saa kumi jioni watakuwa na kibarua cha kuwakabili maafande wa Tanzania Prisons katika mchezo utakaorindima uwanja wa Nelson Mandela
Huu ni mchezo ambao unakwenda kudhihirisha ile dhana ya kuwa na kikosi kipana kwani pamoja na kuwakosa baadhi ya wachezaji wake muhimu wa kikosi cha kwanza, kocha Sven Vandenbroeck amesema Prisons wasubiri sapraizi kutoka kwa mabingwa
Sven amesema timu yake itakuwa na mabadiliko ya kimbinu, amewasoma Tanzania Prisons hivyo leo anaamini wana kila sababu ya kupata ushindi
Ni mchezo ambao utapigwa katika mazingira ya viwanja ambavyo sio rafiki kwa soka kutembea chini, lakini Simba hii tayari imedhihirisha viwanja hivyo sio tatizo kabisa
Pale mkoani Dodoma JKT Tanzania walikuwa 4-0 katika uwanja wa Jamhuri ukipigwa mpira wa kiwango cha 'kutisha'
Ni mchezo ambao Simba inahitaji kushinda ili kuendelea kubaki nafasi ya pili kuipa presha Azam Fc iliyoanza vyema msimu kwa kushinda mechi zao zote
Mabadiliko makubwa yanayotarajiwa kwenye kikosi ni kwenye safu ya ushambuliaji baada ya John Bocco na Meddie Kagere wote kukosekana kutokana na majeraha
Lakini pia, eneo la kiungo Clatous Chama hatakuwepo na kwenye ulinzi Paschal Wawa nae hatakuwepo
Mzee wa kuwakeraaa Bernard Morrison leo anaweza kuanzishwa kama mshambuliaji pacha na Chris Mugalu huku Francis Kahata akiwa na nafasi ya kurejea kikosini kama ilivyo kwa Hassan Dilunga na Miraji Athumani 'Sheva'
Kennedy Juma anaweza kurejea katika safu ya ulinzi lakini pia Sven anaweza kumtumia Erasto Nyoni ambaye alijumuishwa katika kikosi kilichotua Sumbawanga juzi jioni
