Meneja wa Simba Patrick Rweyemamu amewaelezea Luis Miquissone raia wa Msumbuji na Mghana Benard Morrison kuwa licha kuwa na vipaji vikubwa kwenye kusakata soka, lakini kuna kitu kikubwa kinachowatofautisha ambacho ni tabia zao
Akizungumza jijini Dar es Salaam, Meneja wa klabu hiyo, Patrick Rweyemamu baada ya mazoezi ya utimamu wa mwili 'gym', alisema pamoja na wote kuwa mahiri kwenye kusakata kambumbu, lakini Miquissone yeye kitabia ni mpole sana na si mtu wa kujichanganya kama mwenzake Morrison ambaye ni mcheshi.
"Luis ni mtulivu, si mchangamfu sana, siyo mtu wa kujichanganya sana, nadhani maisha aliyokulia hayakuwa ya kujichanganya, pia inaonekana ndiyo hulka yake." alisema meneja huyo na kumwelezea Morrison kuwa yupo tofauti na mwenzake.
"Yeye Morrison ni mtu wa kujichanganya, mcheshi, kila tukio yupo, pia ni mchekeshaji yaani 'komediani', na hii inasababisha maisha ya kambi yawe rahisi kwa wenzake na watu wengine kwa ujumla," alisema meneja huyo.
Miquissone alisajiliwa na Simba katikati ya msimu uliopita wa Ligi Kuu, kipindi cha dirisha dogo akitokea UD Songo ya Msumbiji alikokuwa akicheza kwa mkopo kutoka Mamelodi Sundowns, huku Morrison akisajiliwa usajili wa dirisha kubwa baada ya kumaliza mkataba na Yanga
