Kocha Mkuu wa Simba Sven Vandenbroeck ameeleza kutofurahishwa na madhambi ya makusudi waliyokuwa wakifanyiwa wachezaji wake kwenye mchezo dhidi ya JKT Tanzania ambao ulipigwa mkoani Dodoma jana Jumapili
Katika mchezo huo ambao uliwashuhudia mabingwa wa nchi wakiondoka na ushindi wa mabao 4-0 huku wakicheza kandanda la kuogopesha, kwa nyakati tofauti wachezaji wa JKT Tanzania waliwafanyia rafu mbaya nyota wa Simba waliokuwa wametakata kwelikweli wakilipiga 'pira' la levo za Kimataifa, mhanga mkubwa akiwa Bernard Morrison
Sven amesema wachezaji wake wamekuwa wakikamiwa na timu pinzani hivyo kuna umuhimu kwa waamuzi kuwalinda ili wasije wakaumizwa
"Tulikuwa na mchezo mzuri, nafurahi kuona wachezaji wangu wamefanya kile nilichowaelekeza na muhimu zaidi tumepata matokeo tuliyoyahitaji. Lakini sikufurahishwa na mchezo waliokuwa wakicheza JKT Tanzania dhidi ya wachezaji wangu.
"Nafikiri kuna umuhimu wa waamuzi kuwalinda wachezaji, kwani imekuwa kawaida kwa timu pinzani kukamia wachezaji wetu, wanayo haki ya kulindwa," alisema Sven
Ushindi wa mabao 4-0 dhidi ya JKT Tanzania umeirudisha Simba kwenye nafasi ya pili nyuma ya Azam Fc ambayo bado imegoma kudondosha pointi baada ya kupata ushindi wa mabao 4-2 dhidi ya Kagera Sugar hapo jana
