Wachezaji watano wa klabu ya Simba wameitwa kujiunga na timu za Taifa kwa ajili ya michezo ya kirafiki ambayo iko katika kalenda ya FIFA
Nyota hao wanaopaswa kujiunga na timu za Taifa kuanzia Oktoba 05 ni Luis Miquissone (Msumbiji), Francis Kahata (Kenya), Clatous Chama (Zambia), Larry Bwalya (Zambia) na Joash Onyango (Kenya)
Michezo ya kirafiki ya Kimataifa itapigwa kati ya Oktoba 10 na Oktoba 14 kwa wastani wa wiki moja kabla ya mchezo wa watani wa jadi utakaopigwa Oktoba 18
Changamoto iliyopo ni kuwa nyota hao huenda wakashindwa kurejea kwa wakati kuuwahi mchezo dhidi ya Yanga
Meneja wa Simba Patrick Rweyemamu amesema ni vyema Shirikisho la Mpira wa Miguu (TFF) likahakikisha wanapanga ratiba zao kwa kuzingatia kalenda za michezo ya Kimataifa
"Wachezaji wanapaswa kusafiri Oktoba 05 lakini sisi Oktoba 04 tunapaswa kuwa mkoani Dodoma kucheza na JKT Tanzania. TFF wanapaswa kuliangalia hili kwa umakini zaidi huko mbeleni kwani kalenda ya FIFA inafahamika. Ratiba inapaswa kuzingatia kalenda za Kimataifa ili kuwapa nafasi wachezaji kutumikia timu zao za Taifa kwa Uhuru," aisema
Bado kuna changamoto ya usafiri iliyosababishwa na ugonjwa wa corona, Miquissone na Chama walichelewa kujiunga na wenzao mwanzoni mwa msimu kutokana na changamoto hiyo
Hata hivyo uongozi wa Simba umesema wanaamini nyota hao watarejea kwa wakati kuwahi mchezo dhidi ya Yanga na hata wakikosekana haliwezi kuwa tatizo kwao
