Kiungo mshambuliaji wa Simba Francis Kahata amesema ushindani wa namba ndani ya kikosi cha Simba umeongezeka kutokana na kila nafasi kuwa na wachezaji wenye viwango vya juu
Tangu kuanza kwa msimu huu Kahata hajafanikiwa kupata nafasi ya kuanza kwenye kikosi cha kocha Sven Vandenbroeck na wakati mwingine ameshindwa kuingia katika kikosi cha wachezaji 18
Pamoja na changamoto hiyo Kahata amesema anayafurahia maisha ndani ya kikosi cha Simba na ataendelea kupambana ili kupata nafasi ya kuanza.
"Kila mchezaji anayecheza anacheza kwa ajili ya timu, na timu ikishinda tumeshinda wote, ushindani ni mkubwa lakini hali hiyo ni nzuri kwa wachezaji kwa sababu inakuwa ni changamoto kwa kila mchezaji kuongeza juhudi mazoezini.
"Mwanzoni mwa msimu sikuwa fiti kwani nilipata majeraha ingawa sasa yamepona na nipo fiti kucheza, lakini ushindani wa namba ni mkubwa na hilo ndilo linalotakiwa, sina wasiwasi najua nitacheza tu," alisema Kahata
Ujio wa wachezaji Bernard Morrison na Larry Bwalya umepelekea Mkenya huyo kutokuwa na uhakika wa kuanza kama ilivyo kwa Miraji Athumani na Hassan Dilunga
Nyota huyo wa Kimataifa wa Kenya amesema anaamini ni muda tu unahitajika na kuongeza juhudi mazoezini ili kumshawishi Kocha Mkuu Sven Vandenbroeck kumpanga katika kikosi cha kwanza
