Jana usiku Wanasimba walishuhudia moja ya michezo bora kutoka kwa timu yao pale ilipoifumua Biashara United mabao 4-0 katika mchezo wa ligi kuu uliopigwa uwanja wa Benjamin Mkapa
Ulikuwa usiku wa mafundi! Simba hii inapokuwa hapo kwa Mkapa wapinzani wajipange kwelikweli
Ulikuwa usiku wa Mzambia Clatous Chama, huyu Mwamba wa Lusaka kwa kweli sio levo za kucheza soka la Afrika
Ni mchezaji aliyekamilika kiufundi, mabao yake mawili pamoja na kiwango bora alichoonyesha jana kinadhihirisha kwa sasa hana wa kufanana nae hapa nchini
Lakini achana na Chama, Mmakonde Luis Miquissone ndiye aliyewavuruga zaidi Biashara United na kumfanya Chama apendeze uwanjani
Ushirikiano wake na Wazambia Chama na Larry Bwalya lilikuwa tatizo kubwa kwa Biashara United
Kwa hakika Wanamsimbazi wana kila sababu ya kujivunia usajili wa huyu mtu, msimu huu unaweza kuwa wa historia kwa Simba hasa kule kwenye michuano ya ligi ya mabingwa
Kasi yake na uwezo mkubwa wa kutembea na mpira, ubunifu na uwezo wa kutumia miguu yote miwili unamfanya Miquissone kuwa mchezaji wa kipekee katika kikosi cha Simba
Kama Simba itaendelea kucheza hivi, nadhani huu ni msimu mwingine Wanamsimbazi watashangilia 'treble'
