Baada ya uteuzi wa Mtendaji Mkuu mpya wa Simba kutangazwa hapo jana, mjadala mkali umeibuka kwenye mitandao ya kijamii, Waziri wa Maliasili na Utalii Dk Hamis Kingwangalla akiongoza mjadala huo
Dk Kigwangalla ameonekana kutokubaliana na uteuzi wa Barbara Gonzalez ambaye kabla ya kupewa majukumu hayo, alikuwa Mtendaji wa Mo Dewji Foundation pamoja na kufanya kazi nyingine kama Msaidizi wa Mwenyekiti wa Bodi ya Wakurugenzi ambaye ndiye Mwekezaji wa klabu ya Simba, Bilionea Mohammed Dewji
Mjadala huo ni kama umetoka kwenye hoja ya Msingi ambayo ni uteuzi wa Barbara
Sijafahamu tatizo liko wapi katika uteuzi wa Barbara. Huyu ni Mwanamama msomi na mwenye uzoezu wa kuongoza Taasisi kubwa
Siamini kama Bodi ya Wakurugenzi inaweza kukurupuka kumteua yeye kuchukua majukumu yaliyoachwa na Senzo Mazingiza
Hata Mazingiza alipoondoka, aliyekuwa akishika nafasi yake ni huyuhuyu Barbara, amefanya kazi ya Kukaimu kwa mwezi mzima
Nadhani hili ni jambo ambalo halipaswi kuwashughulisha sana Wanasimba, Barbara apewe muda afanye kazi kama kutakuwa na mapungufu yataonekana
Masuala ya mchakato wa uwekezaji yamejadiliwa sana, na imeelezwa kuwa mchakato bado haujakamilika
Imeelezwa pia Bilioni 20 zipo, zinasubiri tu mchakato huo ukamilike lakini muhimu zaidi Mo amekuwa akitoa takribani Bilioni 3 kila mwaka kwa ajili ya uendeshaji wa timu
Haya ni masuala ambayo Wanasimba wanayafahamu, na hayawezi kuwasumbua kwani klabu mpaka sasa iko kwenye mikono salama, imeendelea kupata mafanikio
Leo msimu mpya wa ligi kuu unaanza, Wanasimba wasitolewe kwenye 'reli' kwa mijadala hii isiyokuwa na Afya
