Kikosi cha mabingwa wa nchi, Simba kiliwasili jijini Mbeya jana wakitua jijini humo na lengo moja tu, kuanza msimu kibabe dhidi ya Ihefu Fc siku ya Jumapili katika mchezo ambao utapigwa uwanja wa Sokoine
Kocha Mkuu wa Simba Sven Vandenbroeck amesema mwanzoni mwa msimu kila timu ina nafasi sawa ya kufanya vizuri hivyo wanatarajiwa ushindani utakuwa mkubwa
Sven pia ameeleza kufuatilia usajili uliofanywa na timu nyingine, kila timu imejipanga kufanya vizuri kwenye michezo ya awali
Mbelgiji huyo amesema timu itakayopata ushindi katika mechi zake za kwanza, ndiyo itajiweka kwenye mazingira mazuri kwenye mbio za ubingwa na wachezaji wake watakuwa kwenye nafasi nzuri ya kupambana.
Kocha huyo alisema licha ya kikosi chake kuwa na nyota wenye uwezo, hakuna mchezaji ambaye ana namba ya kudumu katika kikosi cha kwanza, hivyo nyota wote watalazimika kujituma ili kupata nafasi ya kucheza.
"Tutaelekea kwenye mechi ya ligi, tuko tayari, tunajua hakuna mechi rahisi mbele yetu, sisi ndio mabingwa wa msimu uliopita, tunatakiwa kuendeleza ubora wetu, tunahitaji kujiimarisha kila siku," alisema
Naye Meneja wa Simba Patrick Rweyemamu amesema leo timu imeanza programu maalumu kwa ajili ya kujiandaa na mchezo dhidi ya Ihefu.
"Tunatarajia kufanya mazoezi kwenye Uwanja wa Sokoine, huenda tukawa na vipindi viwili kwa siku au kimoja, kesho (leo) asubuhi tutakabidhiwa na kocha mkuu, kwa kifupi timu iko tayari kwa mapambano, kila mechi kwetu ni muhimu, hatutadharau mchezo wowote," Rweyemamu alisema.
