Uongozi wa klabu ya Simba umethibitisha kuwasilisha maombi Wizara ya Kazi kwa ajili ya kuwaombea vibali vya kufanya kazi nchini wachezaji wao wa kigeni waliosajiliwa katika dirisha hili la usajili
Wachezaji hao walioombewa vibali ni pamoja na Mghana Bernard Morrison, Mkenya Joash Onyango, Chris Mugalu (DR Congo) na Mzambia Rally Bwalya.
Katibu Mkuu wa Simba, Arnold Kashembe, amesema klabu imefuata taratibu zote hivyo wanasubiri kujibiwa na wizara husika.
"Tumepeleka maombi yetu katika mamlaka husika ya kuomba vibali vya kazi kwa wachezaji wetu wa kigeni akiwamo Morrison, mchakato huo unaendelea," alisema Kashembe.
Naye Msemaji wa Idara ya uhamiaji, Paul John Mselle alisema wao wanatoa vibali vya makazi baada ya mhusika kupata kibali cha kazi.
Alipoulizwa Kamishna wa Kazi, Andrew Mwaluisi, alisema: "Tumepokea maombi mengi ila tusubiri Jumatatu tutajua."
Vibali hivyo inapaswa vipatikane kabla ligi kuanza wiki ijayo kwani nyota hao hawataruhusiwa kucheza kama hawatakuwa na vibali vya kufanya kazi nchini
