Mkufunzi wa zamani wa timu ya Taifa ya Kenya, Harambe Stars, Adel Amrouche amesema beki Joash Onyango aliyesajiliwa na Simba ni kati ya mabeki bora aliowahi kufanya nao kazi
Amrouche amesema wanaombeza wataona tofauti pale atakapoanza kucheza.
Amesema kawaida Onyango hana mvuto kwa mashabiki badala yake ana mvuto mkubwa kwa watu wa ufundi kwa maana ya makocha.
Onyango amejiunga na Simba akitokea Gor Mahia ya Kenya kwa kandarasi ya miaka miwili na mchezo wake wa kwanza ulikuwa dhidi ya Vital'O ya Burundi ambapo Simba ilishinda mabao 6-0 Uwanja wa Mkapa.
"Ni miongoni mwa wachezaji wazuri ambao hawavutii nje ya uwanja lakini uwezo wao ni ndani ya uwanja hivyo ninaamini atafanya makubwa ambayo wengi hawataamini," alisema
Onyango ameanza maisha yake vyema kwenye kikosi cha Simba, amefanya vizuri katika mechi zote tatu za kujipima alizocheza
Keshokutwa Jumapili anatarajiwa kuwa sehemu ya kikosi kitakachoikabili Namungo Fc kwenye mchezo wa Ngao ya Jamii utakaopigwa mkoani Arusha, uwanja wa Sheikh Amri Abeid
