Msemaji wa klabu ya Simba Haji Manara amesema mabingwa hao wa nchi kwa misimu mitatu mfululizo wamedhamiria kutwaa ubingwa kwa msimu wa nne ndio maana wamekamilisha usajili mapema na tayari wameanza mazoezi
Manara amewataka wapinzani wao Yanga waanze kuandaa malalamiko yao mapema kwani ligi itakapoanza hawatakuwa na huruma
"Waambieni hao wanaozurura huko mitaani waandae kabisa malalamiko, na safari hii wasiwasingizie waamuzi. Mmeona sisi tumesajili tayari na timu yetu imeshaingia kambini, lakini naona wao wanazurura tu. Halafu ligi ikianza wanaanza kulalamika kuwa wanaonewa na hata kuwatwisha mzigo wa lawama waamuzi"
"Tunawaambia sisi tuko makini, ligi itakapoanza kila mmoja ataelewa nini tunamaanisha na hatutaki malalamiko kutoka kwa timu yoyote" alitamba Manara
Kikosi cha Simba kiliingia kambini tangu juzi Jumatatu kujiandaa na mchezo wa Simba Day dhidi ya Vital'o ambao utapigwa Jumamosi ijayo
Lakini pia mabingwa hao wa nchi wanakabiriwa na mchezo wa Ngao ya Jamii dhidi ya Namungo Fc August 30 wakati mchezo wa ufunguzi wa msimu mpya wa ligi wataanzia ugenini dhidi ya Ihefu Fc Septemba 07 mkoani Mbeya
