Mkuu wa Kitengo cha habari na Mawasiliano klabu ya Simba Haji Manara amesema maandalizi kuelekea kilele cha wiki ya Mabingwa, SIMBA DAY siku ya Jumamosi, August 22 yanaendelea vizuri
Akizungumza na Wanahabari leo katika Mkutano uliofanyika Hoteli ya Serena, Manara amesema uamuzi wa kuileta Vital'o ya Burundi ulifikiwa baada ya kuzikosa baadhi ya timu wakiwemo mabingwa wa kihistoria ligi ya mabingwa Al Ahly, kutokana na changamoto ya corona
Hata hivyo amesema Vital'o sio timu ya kubeza na anaamini watawapa changamoto mabingwa hao wa Tanzania Bara
"Tulipanga kucheza na Al Ahly lakini changamoto ya corona imefanya jambo hilo kuwa gumu. Tunaamini Vital'O itatupa changamoto nzuri kwenye mchezo huo," alisema
"Vital'O itafika ijumaa saa 5 asubuhi na jioni timu zote zitafanya mazoezi kwenye uwanja wa Mkapa"
Manara amesema siku hiyo burudani zitakuwa nyingi kutoka kwa wasanii mbalimbali walioalikwa lakini kubwa zaidi atakuwepo Diamon Platinumz, moja wa mabalozi wa Simba, yeye akiwa na zawadi maalum kwa mashabiki wa Simba
"Burudani itatolewa na Twanga Pepeta, Tunda Man, Meja Kunta, Mwasiti na kipekee atakuwepo Diamond Platinumz. Litakuwa kama tamasha la mziki, amekusudia kufanya jambo kubwa na kwa kupitia hilo kesho alhamisi kutakuwa na BIG SURPRISE kwa Wanasimba. MC atakuwa Mpoki."
Aidha akitaja viingilio vya tukio hilo, Manara watatumia viwanja viwili, Uwanja wa Mkapa na Uwanja wa Uhuru
Kwa mashabiki watakaoingia uwanja wa Uhuru watalipa Tsh 2,000/- na watapata fursa ya kuona kila linaloendelea ndani ya uwanja wa Mkapa
Aidha wachezaji wataanzia uwanja wa Uhuru kuwasalimia mashabiki kabla ya kuelekea uwanja wa Mkapa
Viingilio vya Uwanja wa Mkapa;
Mzunguko: 7,000/=
VIP C: 20,000/=
VIP B: 30,000/=
VIP A: 40,000/=
Platinum tickets: 150,000/=
Kwa mashabiki 10 wa mwanzo ambao watanunua tiketi za Platinum, watapata fursa ya kushiriki hafla maalum ambayo itafanyika usiku ikiwahusisha wachezaji pamoja na viongozi wa Simba na Vital'o
