Mshauri wa Mwenyekiti wa Bodi ya Wakurugenzi klabu ya Simba, Crescentius Magori ameeleza kushangazwa na tetesi nyingi zinazomuhusu kiungo wao Mzambia Clatous Chama kuwa amesajiliwa na Yanga
Magori amesema Chama aliyeibuka kuwa kiungo na mchezaji bora wa VPL msimu wa 2019/20, ni mchezaji halali wa Simba na bado ana mkataba na mabingwa hao wa nchi
CEO huyo wa zamani wa Simba amesema katika hali ya kawaida wangekuwa viongozi wajinga kama wasingemuongezea mkataba kutokana na ubora alionao
"Hivi katika hali ya kawaida unafikiri Simba inaweza ikamuacha tu Chama acheze bila ya kuwa na mkataba mrefu? Hatuwezi kufanya hivyo, Wanasimba hata wasiwe na wasiwasi Chama ni mchezaji wetu halali. Kama kuna timu inamtaka basi waje mezani na sio chini ya dola 800,000 tunaweza kufikiria kuwauzia," alisema Magori
Baada ya Simba kutangaza usajili wa winga Bernard Morrison, taarifa zikasambazwa kwenye mitandao ya kijamii mashabiki wa Yanga wakitamba kuwa wamemsajili kiungo huyo fundi
Msimu uliopita Chama aliongeza mkataba wa miaka miwili ambao utamalizika Julai 21 2021
