Mkufunzi wa Simba Sven Vandenbroeck amesema vijana wake wako tayari kuelekea mchezo wa fainali ya kombe la Shirikisho la Azam dhidi ya Namungo Fc ambao utapigwa kesho Jumapili kwenye uwanja wa Nelson Mandela huko Sumbawanga
Akizungumza na wanahabari baada ya kikao cha mwisho kuelekea mchezo huo, Sven amesema walichofuata Rukwa ni kombe hivyo atatumia silaha zake kamili kuhakikisha wanashinda mchezo huo na kuongeza taji la tatu msimu huu
"Tumekuja hapa kucheza fainali na kushinda ubingwa. Ni mchezo ambao tunahitaji kushinda hivyo tutatumia wachezaji wetu wote bora ili kuhakikisha tunashinda. Wachezaji wote wapo tayari," alisema Sven
Naye nahodha wa mabingwa hao wa nchi John Bocco amesema pamoja na kuwa wanakutana na moja ya timu bora sana msimu huu, maandalizi waliyofanya yanawapa matumaini makubwa ya kushinda
"Tunaamini tunakutana na mpinzani mzuri, anatujua na sisi tunamjua lakini tunaamini maandalizi yetu na kwa kumtanguliza Mungu tunaamini kesho tunaenda kupambana na kushinda ubingwa wa FA"
"Tunachoangalia sana kesho ni kuandika historia kuchukua makombe matatu msimu huu (Ngao ya Jamii, Ligi Kuu na kombe la FA). Ni moja ya malengo tangu tunaanza msimu na hiyo ni kama hamasa kwetu ya kutafuta ushindi hapo kesho," alisema Bocco
Mchezo huo utapigwa Jumapili kuanzia saa tisa kamili Alasiri
