Mabingwa wa nchi Simba kwa sasa wanakamilisha ratiba tu kwenye ligi wakisubiri mchezo wa nusu fainali kombe la FA dhidi ya Namungo Fc ambao utapigwa kule Sumbawanga August 02 2020
Inaelezwa tayari hesabu za kuelekea msimu mpya zimeanza na pengine baada ya mchezo dhidi ya Namungo, majina ya wachezaji watakaotemwa yatawekwa hadharani ili kuwapa muda wa kusaka maisha mahali pengine
Umekuwa ni utaratibu wa Simba kuachana na wachezaji kistaarabu na ndio maana wengine huweza kurejea pale viwango vyao vinapoimarika
Mtendaji Mkuu wa Simba Senzo Mazingisa ameweka bayana kuwa hawatafanya usajili mkubwa sana kama ilivyokuwa msimu uliopita kwani timu haina mapungufu makubwa
Kwa maana hiyo hata idadi ya wachezaji ambao wataachwa haiwezi kuwa kubwa
Idadi ya nyota wapya haitazidi watano huku idadi kama hiyo itakuwa kwa wachezaji watakaoonyeshwa mlango wa kutokea
Miongoni mwao inaelezwa ni kiungo Msudan Sharaff Elden Shiboub ambaye ameshindwa kupenya kwenye kikosi cha kocha Sven Vandenbroeck
Shiboub hajajumuishwa katika safari ya mkoani Tanga na inaelezwa pengine yuko mbioni kuondoka nchini baada ya mazungumzo ya mkataba mpya kukwama
Tairone Santos, beki huyu kutoka Brazil naye safari yake imewadia baada ya kuwatumikia mabingwa hao wa nchi kwa msimu mmoja tu
Wakati yeye akiondoka, mwenzie Gerson Fraga amejihakikishia kuendelea kubaki Msimbazi, akisubiriwa kusaini mkataba mpya
Kwa upande wa wachezaji wazawa ambao wako kwenye hatihati ya kuachwa ni mlinzi wa kulia Haruna Shamte na beki wa kati Yusufu Mlipili
Kuimarika kwa kiwango cha Kennedy Juma, kumemuweka matatani Mlipili kwani Simba inatarajiwa kusajili beki mwingine wa kati atakayeshirikiana na hawa waliopo
Dirisha la usajili litafunguliwa rasmi wiki ijayo, August 01
