Kocha Mkuu wa Simba Sven Vandenbroeck ana nafasi kubwa ya kuongezewa mkataba na mabingwa hao wa nchi licha ya tetesi za ujio wa kocha wa AS Vita Florente Ibenge
Pamoja na kuanza maisha yake katika klabu ya Simba kwa kusuasua, kwa kiasi kikubwa, Sven anaonekana kuirejesha timu katika makali yake ya msimu mmoja nyuma ikicheza kandanda safi na sasa ikifunga mabao mengi
Mjumbe wa Bodi ya Wakurugenzi ambaye hakutaka jina lake liwekwe hadharani, amesema kuwa Sven ataendelea kubaki Msimbazi kwani litakuwa jambo la kushangaza kumuondoa kocha huo kutokana na mafanikio aliyopata
"Tulianza msimu vibaya lakini furaha yetu Sven ameirejesha kwa kutuwezesha kutwaa ubingwa wa ligi kuu mapema pamoja na kutinga fainali ya michuano ya kombe la FA. Lakini pia timu yetu inaonekana kuimarika, vijana wanacheza kandanda safi. Nakuhakikishia, tutaendelea kuwa na Sven kwa msimu ujao pia wa 2020-2021," alisema
Hivi karibuni Mtendaji Mkuu wa Simba Senzo Mazingisa alisema baada ya kutwaa ubingwa na kutinga fainali ya FA, sasa wanaelekeza nguvu kwenye maboresho ya kikosi kuelekea msimu ujao wakijipanga kufanya vizuri kwenye michuano ya ligi ya mabingwa
Sven tayari amewasilisha mapendekezo ya maboresho anayotaka, ikielezwa Simba huenda ikaongeza nyota wanne tu
Alipojiunga na Simba mwezi Disemba 2019, Sven alipewa mkataba wa miezi sita ambao unamalizika baada ya msimu kufika tamati wiki ijayo
Lakini ni wazi Mbelgiji huyo atapewa mkataba mpya
