Nahodha wa Simba John Bocco amesema wamejiandaa kikamilifu kuhakikisha wanapata ushindi kwenye mchezo wa ligi kuu dhidi ya Namungo Fc ambao utapigwa kesho Jumatano katika uwanja wa Majaliwa huko Ruangwa
Mchezo huo utafuatiwa na hafla ya kukabidhi Simba ubingwa wa ligi kuu ambao wameutwaa kwa misimu mitatu mfululizo
Bocco amesema wanafahamu mchezo huo hautakuwa mwepesi kutokana na ubora wa kikosi cha Namungo kitakachokuwa kikicheza katika uwanja wake wa nyumbani
Hata hivyo, amesema ili kunogesha shamrashamra za ubingwa, wanahitaji kushinda
"Tunaiheshimu Namungo ni timu nzuri na ipo kwenye kiwango bora kwa sasa na tunaenda kucheza kwenye uwanja wao tunajua mechi itakuwa ngumu lakini tumejipanga kuhakikisha tunashinda"
"Tutafuata maelekezo ya walimu watakayotupa kuelekea mchezo huu na sisi kama wachezaji tunajua umuhimu wa hii mechi na tutahakikisha tunashinda ili sherehe za ubingwa wetu ziwe nzuri," Bocco aliiambia tovuti ya Simba
Baada ya kujiunga na Simba akitokea klabu ya Azam Fc, Bocco ameweka rekodi ya kushinda ubingwa wa ligi kuu kwa misimu mitatu mfululizo
Wakati anasajiliwa na Simba, mchezaji huyo mkongwe alionekana kama muda wake umeisha
Hata hivyo kwa mambo aliyofanya ndani ya kikosi cha Simba katika misimu yake mitatu, heshima yake imeendelea kubaki juu
