Mapema leo, beki Shomari Kapombe alifanyiwa vipimo Hospitali ya Taifa ya Muhimbili kubaini ukubwa wa majeraha ambayo amepata baada ya kufanyiwa madhambi na Frank Domayo hapo jana
Taarifa iliyotolewa na klabu ya Simba, imebainisha kuwa baada ya kufanyiwa vipimo, anaendelea vizuri
"Shomari Kapombe leo asubuhi amefanyiwa vipimo vya kina ili kujua amepata majeraha ya aina gani na ukubwa wa hayo majeruhi (MRI). Taarifa ya majibu ya vipimo itatolewa pindi yatakapotoka. Lakini kwa sasa anaendelea vizuri," imesema taarifa ya Simba
Kumekuwa na hofu kuwa nyota huyo anaweza kuwa ametonesha majeraha yaliyomuweka nje kwa zaidi ya miezi nane msimu uliopita
Wadau wa soka nchini wamelitaka shirikisho la mpira wa miguu Tanzania (TFF) kumchukulia hatua Domayo kwani alidhamiria kumuumiza Kapombe
Ni huyu huyu Domayo ambaye alimuumiza nahodha John Bocco kwenye mchezo wa Ngao ya Jamii na kumfanya akae nje kwa karibu miezi minne
