Kocha Mkuu wa Simba Sven Vandenbroeck amesema anafahamu mashabiki wanapenda kuwaona wachezaji wanaowapenda wakipata nafasi ya kucheza katika kikosi cha kwanza mara kwa mara
Hata hivyo amesema kila mchezaji anapaswa kupambana ili kustahili kupewa nafasi ya kuonekana kikosini
Jana Sven aliwapa nafasi kiungo Said Khamis Ndemla na Yusufu Mlipili katika mchezo dhidi ya Mwadui Fc na mabingwa hao watetezi kufanikiwa kuondoka na ushindi wa mabao 3-0
Ndemla aling'ara sana kwenye mchezo huo akishirikiana vyema na Gerson Fraga katika eneo la kiungo
Sven amewataka wachezaji hao wapambane zaidi ili aendelee kuwapa nafasi kwenye kikosi cha kwanza
"Nafahamu watu wanafurahi kumuona Ndemla na Mlipili, kwenye mahojiano mengi naulizwa maswali yanayojirudia kuhusu majina hayo na mengine"
"Niliwaambia wachezaji wangu wakati tunaanza mazoezi baada ya mapumziko ya Corona, kama utajituma na kunionesha uwezo mazoezini utapata nafasi"
"Kila mmoja anapaswa kufanya kazi kwa asilimia zote sio 60% wala 70% kwa sababu mwisho wa ligi ndio bingwa anakabidhiwa kombe kwa hiyo wakati huu bado tunahitaji kuwa makini," alisema
