Mshambuliaji wa Simba Meddie Kagere amesema amejiwekea malengo ya kuvunja rekodi yake ya mabao 23 aliyoweka msimu uliopita
Pamoja na kutokuweka bao kambani kwenye mchezo uliopita, Kagere amesema hilo halimsumbui kwani anaamini atapata nafasi nyingine katika mechi zijazo
"Kama mshambuliaji, nimejiwekea malengo ya kufanya zaidi, hivyo hata ikitokea sijafunga katika mechi tano mfululizo hilo halinisumbui kwani najua wakati wangu utafika," amesema
"Jukumu langu la kwanza ni kuhakikisha timu inapata matokeo bila ya kujali nimefunga au la. Huwa napambana zaidi nifunge lakini hata nisipofunga, basi nitoe usaidizi kwa wenzangu waweze kufunga"
Kagere amepachika mabao 19 mpaka sasa, anahitaji kufunga mabao manne tu kuweza kuifikia rekodi yake ya msimu uliopita ingawa Wanamsimbazi wanatamani kuona anafunga angalau mabao nane ili kuweza kuweka rekodi mpya ya mabao ya muda wote
Kesho Jumamosi, Kagere atakiongoza kikosi cha Simba kwenye mchezo wa ligi kuu dhidi ya Mwadui Fc ambao utapigwa uwanja wa Taifa kuanzia saa kumi kamili jioni
