Pamoja na sare ya bao 1-1 katika mchezo wa juzi dhidi ya Ruvu Shooting, Kocha wa Simba, Sven Vandenbroeck, amewataka mashabiki wa timu hiyo waendelee kuiunga mkono timu yao ili waweze kutimiza malengo
Jana Simba ilicheza mchezo wa kirafiki dhidi ya Transit Camp na kupata ushindi wa mabao 4-0, mchezo ambao ulipigwa uwanja wa Uhuru
Katika mchezo huo Sven alitumia wachezaji ambao hawakucheza juzi na wale ambao walicheza dakika chache
Baada ya mchezo, Sven alisema pamoja na timu yake kushinda mchezo huo, bado wanahitaji kuongeza stamina na 'fitnes' ya wachezaji ili kuweza kurejesha kiwango walichokuwa nacho kabla ya ligi kusimama
"Tumeshinda mechi zote za kirafiki lakini bado tunahitaji kujiimarisha. Juzi hatukuweza kushinda mchezo wa ligi lakini nadhani hatupaswi kulaumiana kwa kuwa ni kawaida kwenye mchezo wa soka, tunapaswa kuwekeza nguvu kwenye mchezo ujao"
"Wachezaji walipambana kupata ushindi lakini matokeo hayakuwa mazuri sana. Hakuna haja ya kumlaumu mchezaji yoyote, mashabiki lazima waelewe matokeo kama haya yanatokea kwenye mpira, nimewataka wachezaji wangu sasa kuelekeza mawazo yao kwenye mchezo ujao," alisema Sven
Simba itashuka kwenye uwanja wa Taifa siku ya Jumamosi kuumana na Mwadui Fc kwenye mchezo wa mzunguuko wa 30
