Waziri Mkuu wa Jamhuri ya Muungano Mh Kassim Majaliwa ameipongeza klabu ya Simba kwa mafanikio iliyopata katika kipindi cha miaka ya hivi karibuni
Jana wakati akiwasilisha hotuba yake ya kuhitimisha bunge la Bajeti, Mh Majaliwa alisema mafanikio iliyopata Simba na hata sasa ikikaribia kutwaa ubingwa kwa msimu wa tatu mfululizo, ni wazi haina mshindani hapa Tanzania
"Simba inakaribia kutangaza ubingwa ikiwa na michezo mingi mkononi, sasa nini faida ya mkuki?, " alisema Waziri Mkuu ambaye alikuwa akijibu tambo za Waziri wa Fedha Mh Philip Mpango alizotoa juzi Bungeni hapo akizungumzia ushindi waliopata Yanga dhidi ya Simba
"Mfungaji anayeongoza kwenye ligi ni Meddie Kagere aliyefunga mabao 19, hatujaona timu ya Wananchi ikiongoza kwenye mabao"
"Msimu mmoja nyuma, Simba iliandika historia kwenye michuano ya ligi ya mabingwa kwa kufanikiwa kutinga hatua ngumu ya robo fainali, haya ni mafanikio ambayo hakuna timu imeyapata katika kipindi cha miaka 15"
Kauli hiyo ya Waziri Mkuu iliamsha shangwe kutoka kwa wabunge pamoja na Spika wa Bunge Mh Job Ndugai ambaye ni Mwanachama wa klabu ya Simba
