Baadhi ya mashabiki wa klabu ya Simba wamelia na benchi la ufundi kwa kufanya mabadiliko ya kikosi mara kwa mara katika mchezo muhimu
Jana Simba ililazimishwa sare ya bao 1-1 dhidi ya Ruvu Shooting katika mchezo uliopigwa uwanja wa Taifa
Baada ya kufunga bao, wachezaji wa Simba walionekana 'ku-relax' hasa kwenye kipindi cha kwanza hali iliyowapa nafasi Ruvu Shooting kurejea mchezoni na kufanikiwa kurudisha bao hilo
"Wachezaji wetu wamejisahau sana, sijui walidharau mchezo. Lakini pia kocha nae kazingua, kila siku anajaribu wachezaji tu, hana kikosi cha kwanza. Umeona kipindi cha kwanza timu ilikuwa haieleweki angalau kipindi cha pili tulicheza mpira lakini tulikuwa tumechelewa" alisikika shabiki mmoja
Hata hivyo kocha mkuu wa Simba Sven Vandenbrock amewatoa hofu mashabiki kwani timu yao itarejesha makali yake
Mbelgiji huyo amesema walitarajia kupata changamoto katika mechi za mwanzo baada ya ligi kurejea hasa ikizingatiwa wachezaji walikaa muda mrefu bila ya kucheza mpira
Pamoja na sare hiyo, ni muujiza pekee ambao utaifanya Simba isiweze kutetea ubingwa wake kwa msimu wa tatu mfululizo sasa wakihitaji alama 13 kumaliza kazi
