Nahodha wa Simba John Bocco, amesema kwa sasa hawafikiri jambo lolote zaidi ya mchezo wa Ligi Kuu Tanzania Bara dhidi ya Ruvu Shooting utakaochezwa Jumapili hii, kwenye Uwanja wa Taifa, Dar es Salaam.
Bocco amesema baada ya kukaa kwa zaidi ya miezi miwili bila ya kucheza mpira, wanafahamu mwendelezo wa ligi hiyo utakuwa ni mgumu kwa sababu kuna timu zinapambana ili zisishuke daraja.
Bocco alisema timu zinazopigania kubaki kwenye ligi msimu ujao zimefanya maandalizi mazuri ili kuhakikisha zinashinda michezo yao, kuliko zile zinazowania ubingwa.
"Ligi lazima itakuwa ngumu tu, tena tunaweza kukutana na mambo ambayo hatukuwahi kukutana nayo kwenye mechi 28 tulizocheza, kutokana na hili akili zetu zote tumeelekeza katika mechi yetu dhidi ya Ruvu ambayo ndiyo ipo karibu, "alisema Bocco.
Katika mchezo wa mzunguko wa kwanza uliochezwa Novemba 23, mwaka jana, kwenye Uwanja wa Taifa, jijini Dar es Salaam, Simba waliibuka na ushindi wa mabao 3-0 dhidi ya Ruvu Shooting.
Kwa sasa Simba wanaongoza katika msimamo wa ligi hiyo kutokana na pointi 71, huku Ruvu Shooting ikishika nafasi ya 11 kwa pointi 39, baada ya kucheza michezo 28
